Nkhombo Ya Lenard Njikho Yakhazikiskika Mu Msumba wa Mzuzu

Nkhombo ya uyo wakukumba kuzakaimira chigaba cha kumpoto kwa msumba wa Mzuzu ba Lenard Njikho chakhazikiskika pa sabata pa lubaza lwa Botanic mu msumba uwu.

Pakuyowoya ku banthu banandi abo bangufika pa lubaza Njikho wasimikizgira banthu kuchigaba ichi kuti ngwakunozgeka kukaimilira banthu bachigaba ichi ku mphara ya malango pa visola ivyo vikulindizgika kuzachitika mu mwezi wa Seputemba chaka chikwiza.

“Banthu bakanifikiraso kuti nkhabaimilire mwantheura ndine wakunozgeka ndipo nkhombo iyi yipelekenge chakuchita kwa bachiukilano mu chigaba ichi kuti baleke kukapanga vyambula kwenelera.” wanguyowoya Njikho.

Mwakulutilira iye wati waimenge payekha mwakuti wabe na wanangwa wakuyowoya vyakusingo mwambula kuchichizgika.

Mapopa Mgemezulu uyo ngwapachitengo wa komiti yakwendeska nkhombo iyi waonga Njikho pakubika ndalama zakuti ziwovwile bachiukilano kuoneska luso lwabo.

Yumoza mwa mafumu ghamuchigaba ichi Kafwili Nyirongo wati bali na chigomezgo kuti nkhombo iyi yipelekenge mwabi kwa bachiukilano kuti batolepo lwande pankhani ya visola ivyo vikulindizgika kuzachitika chaka chikwiza.

Mumasebero ghakukhazikiskila nkhombo iyi Zolozolo United yangutibula timu ya Lupaso Platinum na vigoli vibiri kwa chimoza ndipo vose vyangwiza muchigaba chakwamba.

Ndipo wakutola nkhombo iyi wazamupokela ndalama yakukwana K1 000 000.

Lenard Njikho wakaba mwimiliri wa ku mphara ya malango kufuma mu chaka cha 2014 kufika mu chaka cha 2019.