Komiti Ya Mzuzu DFA Yachitiska Mayele ya Kotafayino ya Nkhombo ya Castel
Wakulemba: Victor Stephan
Komiti yakwendeska bola la malundi mu msumba wa Mzuzu pa sabata yachitiska mayele ya umo ma kotafayinolo gha nkhombo ya Castel Challenge yayenderenge mu msumba uwu pa nkhumano iyo yanguchitikira ku Luwinga Technical Centre.
Mumayele agha Luwazi United yizamusangana na Hilltop apo SBL yaku Salisbury mu msumba wa Mzuzu yizamusangana na timu Bwabwa United, ndipo timu ya Luvwere United yikwenera kusebera na timu ya Chikombo United apo mu kotafayino yaumaliro Lupaso Platinum yizamusebera na Holera United.
Mwakulutilira mundime yamatimu ghanayi semifinals pachingerezi timu yakuchita makola pa masebero gha matimu gha Luwazi United na Hilltop wazamukumana na Luvwere United na Chikombo United mu masebero ghakwamba ghamatimu ghanayi, apo wakuchita makola pakati pa Lupaso Platinum kweneso Holera United wazamusangana na wakuwina pakati pa SBL na Bwabwa Unite.
Mlembi Mlala wakomiti iyi Alphack Mkandawire wati bali na chizomerezgo kuti matimu ghose ghalutilirenge kusunga nkhalo na malango nangauli wadandaula na unandi wamatimu agho ghakutondeka kufika ku nkhumano usange komiti yabo yachemeska.
“Tili na chigomezgo matimu ghalutilirenge kusunga nkhalo nga mwa nyengo zonse nangauli ndise bakudandaula kuti matimu ghanandi ghakutondeka kufika ku nkhumano nteura nipempho lithu kuti bafikenge ku nkhumano izi.”wanguyowoya mwanteura Mkandawire.
Mkandawire walutilizga kuyowoya kuti masewero agha ghakulindizgika kwamba sabata yikwiza iyi na masebero ghamoza pa chisulo.
Brave Nyasulu yumoza mwa balalabalala ku timu ya Lupaso Platinum wati ni khumbilo kuti batole nkhombo iyi mwakuti timu yabo yipeleke mwabi kubakusebera babo kubonekera pakweru.
“Tili natimu yiwemi mu masebero ghanayi tawinapo ghatatu apo ghamoza tikayana nkhongono ntheura tili na khumbo lakuti titole nkhombo iyi mwakuti tiboneske luso la bakusebera bithu.” Nyasulu wanguyowoya mwachikanga.
Mlembi mlala wa komiti yakwendeska masebero muchigaba chakumpoto uyo wanguba nabo pa nkhumano iyi ba Masiya Nyasulu bangulomba matimu kuti bagwiliske ntchito masebero ghamu nkhombo zakupambana pambana mwakuti batumphuske maluso ghabakusebera babo.
Uyo wazamutola nkhombo iyi paboma wazamutola ndalama zakukwana K1 000 000 kweneso kulutilira kukasangana na matimu ghamu ligi yikulu.
